Përshëndetje të Gjithëve,
Jemi në prag të festave të fundvitit. Kjo është koha e vitit për të festuar dhe reflektuar.
Krishtlindja nuk është vetëm një fjalë e këndshme që ngjall dhe simbolizon ndjenjat e mirësisë, paqes, bashkimit familjar, kënaqësisë dhe qetësisë; është gjithashtu një mundësi shumë e mirëpritur për të kujtuar se çfarë na ka sjellë viti i fundit dhe për të uruar përmbushjen e gjithçkaje që ne shpresojmë për vitin e ardhshëm.
Është një rast i përshtatshëm për të falënderuar të gjithë ata që kanë kontribuar dekada të tëra te ekzistencës së institucionit tonë.
Falenderoj personelin akademik, personelin ndihmës akademik dhe administrativ, studentët tanë, partnerët dhe të gjithë aktoret e tjerët që kanë kontribuar duke përhapur reputacionin e mirë që gëzon institucioni ynë.
Një falenderim i veçantë i takon organeve kolegjiale vendim marrëse të institucionit tonë, Senatit Akademik dhe Bordit të Administrimit, që me vendimarrjen e tyre kanë mundësuar përmbushjen e vizionit dhe zhvillimit të institucionit nëpërmjet mbështetjes se gjithanshme për realizimin e misionit të Universitetit tone.
Krishtlindja është një rast i veçantë për të menduar për rëndësinë e të qenit së bashku si një komunitet akademik dhe për të jetuar dhe punuar me njëri-tjetrin si një bashkësi unike brenda një familjeje më të madhe akademike dhe me qëllimet e ndërsjella të mira të anëtarëve të saj.
Prandaj, le të buzëqeshim dhe të jemi miqësorë, jo vetëm në këto momente të çmuara të Krishtlindjes, por edhe në kohën e zakonshme të vitit. Le të mbajmë pak Krishtlindje me vete gjatë gjithë vitit.
Këto festa duhet të shërbejnë gjithashtu si një periudhë reflektimi për atë që na pret në vitin që po vjen. Ndryshime transformuese pritet të realizohen gjatë vitit të ardhshëm. Le të shpresojmë se besimi, mirëkuptimi dhe diskutimet profesionale rreth përmbajtjes së veprimtasisë sonë, rreth zhvillimit dhe cilësisë do të na shoqërojnë në punën tonë. Le të jetë viti i ardhshëm i pasur me vepra kuptimplotë dhe arritje të rëndësishme dhe çdo ditë të jetë e mbushur me mendime pozitive dhe momente të bukura. Unë ju përcjell juve përshëndetjet e mia më të ngrohta dhe ju uroj juve dhe familjeve tuaja.
Gëzuar Krishtlindjen dhe një Vit të Ri të lumtur dhe të suksesshëm.
Sinqerisht
Rektori i UST-së
Prof.Dr. Agron KASA